ارجوكم لا تضيعوا ثورتنا

رئيس قتل المتظاهرين العزل ونهب وسلب فى مصر لمدة ثلاثين سنة ودخلت مصر فى عهده الى اسوء معدلات الفقر والامية والامراض المزمنة وسوء التعليم ... رئيس حرص على التواطؤ مع اسرائيل بحجة معاهدة السلام واعطاهم الغاز المصرى بملاليم فى حين ان المصريين يحتاجون الى الغاز ويشترونه باضعاف مايحصل عليه الاسرائيليين ........الخ
اعتقد ان رئيساً مثل هذا لايستحق البقاء لحظة واحدة فى السلطة بل يجب محاكمتة بتهمة جرائم الحرب فى حق المصريين العزل ...
الشرفاء هم من يصمدون الان فى التحرير ويرفضون الرحيل حتى يحصلوا على كرامتهم ..
الشرفاء هم من يستمعون الى صوت العقل ولا يتأثرون بإعلام مصرى مزيف لعب بعقول المصريين وعواطفهم ثلاثين سنة...
أما من يدعو الى تهدئة الموقف بحجة الفوضى واننا مش لاقيين امن ولا اكل ولاشرب فأقول لهم ...
اما تستحون من انفسكم .. شباب يموت من اجل بلده وانتم جالسون فى بيوتكم تشتكون من الاكل والشرب والنوم الهانئ ... طول عمرنا من ساعة ماتولدنا عايشين فى ذل وقهر وانتشار للجرائم والمحسوبية والرشاوى والواسطة وفساد التعليم وحكومة بتسرقنا وتنهبنا ورئيس المفروض انه يحافظ على اموال الشعب لكنه بينهبهم وثروته دلوقت تقدر ب 70 مليار دولار ...
كل ده كان بيحصلنا ومش قادرين تصبروا كام اسبوع بعديهم مصر هتدخل عهد جديد والشعب المصرى هيقدر فيه يحقق مستقبله ومن يحكمه ....
صحيح الشجاعة متأصله فى الانسان ولا يمكن شرائها ... فلا نامت أعين الجبناء...
ياشعب مصر ارجوكم لاتضيعوا ثورتنا

حالة ثورة

المشهد الأول:

ارتفع جرس التليفون فى مكتب مستشار الرئيس

السكرتير يرد : الو ... نعم .. ايوه يافندم ... لا سيادته لسه واصل حالاً

بتقول ايه ... احداث خطيرة .. طيب طيب هحول سيادتك له حالاً...

يقوم بتحويل الخط الى مستشار الرئيس..

المستشار : الو ازيك يا رأفت بيه .. بتقول ايه ... الشعب هايج يعنى ايه هايج ؟؟؟

ثورة شعبيه ايه الكلام الفارغ ده .. طيب طيب انا هبلغ سيادة الرئيس حالاً ...

المشهد الثانى :

مستشار الرئيس يدخل الى المكتب الرئاسى بالقصر الجمهورى...

المستشار : معلش ياريس .. انا آسف لإزعاج معاليك بس فى احداث خطيرة بتحصل ..

الرئيس : ايه اللى بيحصل؟؟؟

المستشار : الشعب هايج ياريس ... خرجو فى كل الشوارع والحوارى وعمالين يهتفوا

وبيقولوا مش هيمشوا الا لما ترجعلهم حقوقهم وبلدهم اللى اتسرقت منهم ..

الرئيس : ايه الكلام الفارغ ده ... فين الامن ... فين الشرطة ... اتصلى بحبيب حالاً؟

يافندم انا لسه جيلى تليفون دلوقت حالاً من مكتب وزارة الداخليه بيقول ان الوضع صعب السيطرة عليه..

الرئيس ثائراً : يعنى ايه الكلام ده ... امال فين الامن المركزى فين قوات مكافحة الشغب ؟؟؟

المستشار : للأسف ياريس كتير من القادة وضباط الشرطة عطو الاوامر للعساكر ينزلو مع الناس ويحموهم

وهما بنفسهم نزلو فى وسط الشعب والشعب فرحان بيهم وشالهم على الاكتاف ....

الرئيس : لا مستحيل دى مؤامرة  مؤامرة .. الناس دى لازم تتجاب وتتحاكم ..

طيب وبعدين وبعدين هنعمل ايه هنعمل ايه؟؟؟

التليفون يرن و المستشار يرد

الحق يافندم الشباب الغاضب بيقترب من القصر من كل مكان ومحدش عارف يوقفهم ..

الرئيس فى حالة هستيرية : يعنى ايه .. خلاص .. ثلاثين سنه كده عدت .. خلاص ... فين الحكومة فين الداخلية فين اى حد ... الحق خليهم يجهزولى الطيارة بسرعة انا والاولاد هنخرج بره البلد ..

المستشار وهو ينظر من نافذة الغرفة : مش هتلحق يافندم .. الناس وصلوا القصر ومحوطينه من كل حته ............................................................................................................................

هل ممكن الحال يوصل للشكل ده ؟؟؟ 

ولا ممكن بلدنا تتغير من غير ثورة زى دى ؟؟؟ 

ياترى ايه اللى ممكن يحصل بعد يوم 25 يناير ؟؟؟